Мәтіннің мазмұнын қарау және төмен тапсырманы орындау.
1. Келешекте Қытай әлемдегі жеті кереметтің бірі болып саналатын қорған-қабырғаларымен қатар, пирамидаларымен де мақтана алады. Сонда Қытай пирамидасы қандай?
2. 1945 жылы көктем айында американдық әскери ұшқыш Джеймс Гауссман Орталық Қытайдың Циянь шаһарына жақын жердегі Кин-Линь-Сян тауының үстінен ұшып бара жатып, тау аңғарларының ішінен керемет бір құрылысты көріп қалады. Ұшқыш ойланбастан ғажайып ғимаратты суретке түсіріп алады. Бірақ ол дәл сол кезде, адамзат үшін белгісіз болып келген, құпия пирамиданы тапқанын білген жоқ. Пирамиданың биіктігі 300 метр, ені 500 метр еді. Бұл дегенміз, бүгінгі күні тамсанып жүрген Мысыр пирамидаларының ең үлкені, Ұлы ғимарат саналатын Хеопстен екі есе үлкен. Хеопстің биіктігі 148 метр ғана. Алайда Джеймс Гауссман түсірген сурет Американың әскери мұрағатында кенеттен із-түссіз жоғалып кетті. Қолды болды ма, қайда кетті, ешкім білмейді. Мұны «пирамиданың құпиялығын сақтау үшін қытайлардың өзі ұрлап алды» деген де болжам бар.
3. Қытай билігі мен археологтары «ондай ежелгі құрылыстар біздің аумақта жоқ, болған емес» деп қанша жалтарса да, тағы бір жаңазеландиялық ұшқыш Брюс Кати әлгі құпия пирамидаларды 1960 жылы тағы да кездестірді. Ол өткен ғасырдың басында осы аймақта болған екі австралиялық саудагердің күнделігін тапқан. Күнделікте саудагерлер Қытайдың Шэнси өлкесінде алып пирамидаларды көргенін жазып қалдырыпты. Жазбаларға қарап отырып Брюс Кати бір емес, тұтас пирамидалар қалашығын жасап шықты. Пирамидалардың саны 17 екен. Тұтас қала деуге болады. Бұл қай кезде тұрғызылды, қандай мақсатта? Бұл жағы – құпия, белгісіз. Және шетелдіктердің ол жаққа баруына тыйым салынған. Дегенмен, бұл өңірге 1994 жылы наурыз айында Гартвинг Хаусдорф деген австриялық саяхатшының жолы түсті. Ол бұл аймақтан ірі алты пирамида бар екенін байқаған. Сол жылы тағы да осы өңірге келген Хаусдорф жасырын түрде бейнетаспаға 18 минуттық фильм түсіріп алды. Үйге келіп бейнетаспаны қайта көріп, сарапқа салған ол 2000 шаршы шақырым жерде жүзге тарта пирамида бар екенін көріп таң-тамаша болды.
4. Жалпы, ескі қытай аңызына қарағанда, бұл пирамидаларды бөгде планетадан келгендер тұрғызған көрінеді. Сондай-ақ бұл нысандар бұдан 5000 мың жыл бұрын тұрғызылған деген дерек бар. Сол кезде осы аймақтың императорлары өздерін «көктен темір айдаһар мініп түскен тіршілік иелерінің үрім-бұтағымыз» деп жұртқа айтып отырған. Онымен қоймай, олар «темір айдаһар мінгендер тағы да айналып соғады» деген де ойда болған. Ертеде тұрғызылған бұл ғимараттар нені білдіреді? Жүздеген пирамиданың биіктігі – 25-100 метр. Көлемі де сондай. Тек Цзя Линь өзенінің жағасындағы пирамида ғана ең үлкені болған.
5. Оның үлкендігі жоғарыда айтылды. Оны қытайлықтар «Ұлы Ақ пирамида» дейді. Бір қызығы, қытай пирамидалары Мексика мен Гватемаладағы пирамидалардың сыңары секілді, өте ұқсас. Сонда оларды да салған «аспан ұлдары» ма екен? Рас, Қытай пирамидаларының құпиясы Мысыр пирамидаларынан кем емес. Сыры әлі ашылған жоқ. Қытай өкіметі ол өлкені жабық аудан ретінде қарастырып отыр. Айтар уәжі: «ол жерде жер серігін ұшыратын әуежай бар. Сондықтан бөгде адамдардың ол алқапқа баруына болмайды» деседі. «Ол пирамидаларды қазып неге зерттемеске?» деген сауалға қытайлықтар «бұл болашақ ұрпақтың несібесі, солардың үлесіне қалдырдық» деп қысқа-нұсқа жауап береді. Неге қазір емес, неге болашақта? Оның не құпиясы бар?