АСТАНА. 6 Атыраудағы №30-мектептің 6-сынып оқушысы Мағжан Капесовтің есімі «Қазақстанның таңдаулы адамдары» атты энциклопедияға енді.
Талабы таудай жас өрен мектепаралық түрлі пәндерден өтетін олимпиадалар мен әлемдік көркем мәдениет тарихы бойынша өткізіліп тұратын «Золотое Руно» халықаралық ойынына, «Ақ бота» республикалық интеллектуалдық марафондары мен сүйікті пәні математика мен тіл меңгерудегі халықаралық ойын байқауларына қатысып тұрады. Дарынымен есімі ерекше кітапқа енген Мағжанның анасы Айнұр: - Біздің отбасы қызмет барысымен жиі қоңыс аударады. Мағжан Атырауға келгенше Алматы облысының елді мекенінде қазақ мектебінде дәріс алып, Кипрде орыс мектебінде білім алды. Біз Атырауға 2008 жылы күзде көшіп келдік. Мағжан қаладағы №30 қазақ мектебінде оқып жатыр. Ұстаздары Мағжанның қабілетін жақсы біледі сондықтан оның алға қойған мақсатына жетудегі барлық мүмкіндікті еңсеруіне өз тәжірибелерімен көмектеседі. Ата-анасы біздер де баламыздың талабын қолдап, оның қарым қабілетін жетілдіру үшін математикадан өзге логикалық ойлауға жетелейтін кітаптар мен энциклопедиялық жинақтарды алып беріп, ұлымыздың ойлаған мақсатына жетуіне қолдап білдіріп отырмыз - дейді анасы. Айтпақшы, Айнұр бүгінде екінші - «Психология» мамандығы бойынша диплом қорғауға дайындық үстінде. Мағжанның айтуынша, ол түпнұсқадағы әдебиетті үш тілде оқи алады, грек тілінен де хабары бар, классикалық музыканы тыңдайды, домбырада ойнайды, шахмат ойнағанды, жүзуді және теннисті ұнатады. «Ержеткенде қандай мамандық иесі боласың?» деген « Айқын» газетінің тілшісіне ол: - Математика - сүйікті пәнім. Болашақта қаржыгер мамандығын игеру арқылы еліміздің дамуына осы салада еңбек етіп, үлесімді қоссам деген арманым бар - деген.