АСТАНА. 14 Қазақстан Республикасындағы АҚШ Елшісі Кеннет Фейрфакс екі қазақстандық - Ілияс Камелединов пен Абылай Ахметовке АҚШ Қарулы Күштері әскери оқу орындарына қабылдануға сертификаттар табыс етті.Бұл ҚР Қорғаныс министрлігінің АҚШ елшілігімен бірлесіп атқарған іріктеу жұмысының қорытындысы, деп хабарлады аталмыш ведомоствоның баспасөз қызметінен.

Америка әскери жоғары оқу орындарына қабылдануға үміткерлерді іріктеу 2012 жылдың қазан айында басталған болатын. Іріктеу үдерісіне Қазақстан Қорғаныс министрлігінің Әскери білім және ғылым департаменті жетекшілік етті. Әскери басқару органдарында жеке істерді қалыптастырып, медициналық комиссиядан соң қабылдануға үміткерлер арнайы тексеруден және АҚШ елшілігінде әңгімелесуден өтті, дене даярлығы және TOEFL, SAT деңгейлерінде ағылшын тілін білу бойынша сынақтар тапсырды.

Әдетте шетелдік студенттерге арналған квота саны шектеулі болады. Көптеген қазақстандық үміткерлердің ішінен беделді әскери жоғары оқу орнына қабылдану мүмкіндігіне екі жас жігіт қана ие болды. Орталық Азия өңірі елдері арасында бұл жоғары көрсеткіш, өйткені бір талапкерге шақырту алудың өзіне әрбір республиканың қолы жете бермейді.

Назарбаев Университетінің түлегі Абылай Ахметов АҚШ Құрлық әскерлерінің «West Point» академиясына қабылдануға сертификат алса, Арыстан мамандандырылған лицейін бітірген Ілияс Камелединов АҚШ Қарулы Күштері Әскери-теңіз академиясына қабылданды.

Сертификаттарды табыс ету рәсіміне Әскери білім және ғылым департаментінің бастығы генерал-майор Еділ Оразов қатысты. Іріктеу басталғалы бері ол құжаттарды ресімдеу барысын тікелей қадағалады.

Қурсанттардың оқу мерзімі - 4 жыл. Олардың оқуы АҚШ бюджетінің есебінен жүргізіледі. Қазақстандық тарап оқушылардың каникулдық кезеңінің шығындарын төлеуді көтереді. Отанымызға оралған соң АҚШ әскери жоғары оқу орындарын бітірушілер Қазақстан Қарулы Күштерінде кемінде 10 жыл қызмет етулері тиіс.