АСТАНА. Қарашаның 6-сы. ҚазАқпарат - Қазақстандық жас математиктер командасы Кунминг қаласында өткен Батыс Қытай математикалық олимпиадасында 2 алтын, 1 күміс және 3 қола медальді қанжығалады. Бұл туралы «Дарын» республикалық ғылыми-тәжірибелік орталығынан хабарлады.
Олимпиадаға республика мектептерінің 10-11-ші сынып оқушылары қатысты. Атап айтқанда, Талдықорғандағы №20 мектеп-лицейдің оқушылары Нұрсұлтан Қажымұратов пен Қанат Сатылғанов алтын медаль жеңіп алды. Ал Павлодардағы №8 мектеп-лицейдің 10-шы сынып оқушысы Андрей Дробах күміс медаль иеленсе, дарынды балаларға арналған Ө.Жәутіков атындағы республикалық мамандандырылған физика-математика мектеп-интернатының оқушылары Темірұлан Мұсаев пен Медет Жанболатұлы, сондай-ақ елордалық қазақ-түрік лицейінің оқушысы Рауан Рахмет қола медальді еншіледі.
Батыс қытай математикалық олимпиадасы қазанның 25-і мен қарашаның 2-сі аралығында өтті.