АСТАНА. Қаңтардың 26-сы. ҚазАқпарат /Гүлнәр Жандағұлова/ - Қазақстанда 2081 студент бос білім гранттарының иегері атанды, деп . «Кеше Гранттарды тағайындау жөніндегі республикалық комиссияның отырысы өтті. Бүгін біз бос білім гранттарын тағайындаймыз, 2081 студент гранттарға ие болады», деп мәлім етті Білім және ғылым министрі Жансейіт Түймебаев бүгін өткен баспасөз мәслихатында.
Министрдің айтуынша, өткен жылдан бері 23 737 студент грант иегері атанған, бұл жалпы мемлекеттік тапсырыстың 70 пайызын құрайды. «Бұл білім алып жатқан жастарға мемлекет тарапынан қолдау көрсетудің бұрын-соңды болмаған оқиғасы», дейді ол.
Бос білім гранттары ақылы бөлімдердің студенттеріне, олардың үлгерімдері мен әлеуметтік мәртебелеріне қарап, конкурстық негізде тағайындалып отыр.
Грантқа ие болғандардың 763-і - жетім студенттер, мүгедектер, көп балалы, толық емес және тұрмысы төмен отбасылардың балалары. Сондай-ақ бұл тізімге ата-аналары зейнеткер немесе мүгедек жастар да кіреді.
Айта кету керек, 2009 жылы қосымша және бос білім гранттарына 21 656 студент ауыстырылды, бұл жыл сайынғы мемлекеттік білім тапсырысының 62 пайызын құрайды.