Шымкент полициясына қарасты жылдам қимылдайтын арнайы жасақ шаһардағы №4 балалар үйінің тәрбиеленушілерімен таңғы жаттығу өткізді. Бұл жөнінде өңірлік полиция департаментіне сілтеме хабарлайды.

Жастар жылы аясында Шымкент қалалық полиция департаменті жылдам қимылдайтын арнайы жасақ қызметкерлері №4 балалар үйінің жеткіншектерімен бірге таңғы жаттығу жасады. Мұнда 4-тен 18 жасқа дейінгі балалар тәрбиеленеді. «Полицейлер балаларға дене шынықтыру жаттығуларының кешенін көрсетті. Балалар полиция қызметкерлерімен бірге отырып-тұру, еңкею, аяқпен сермеу, секіру секілді іс-қимылдарды бар ынтасымен орындады. Жаттығудан кейін полицейлер жауынгерлік күрес тәсілдерінің элементтерін көрсетіп, балалармен қимыл-қозғалыс ойындарын ойнады. Балалар бос уақытын пайдалы әрі көңілді өткізді» делінген хабарламада. Іс-шараның мақсаты - балаларды салауатты өмір салтына баулу және дене шынықтыру негіздерін үйрету. Айта кетейік, полиция қызметкерлері балалар үйіне тұрақты барып тұрады. Спорт жаттығудан басталады, ал тәртіп сақшыларымен жаттығу - еліміздегі құқықтық тәртіп пен ұлт денсаулығының кепілі.