– «Педагог мәртебесі туралы» жаңа заң жобасына сәйкес мектеп мұғалімдерінен артық есеп-қисап талап етуге немесе міндетінен тыс өзге жұмысқа тартуға тыйым салынған. Осы орайда бүгінде бас қалада ұсзтардың кәсіби құқығының заң аясында жүзеге асырылу барысы тексерілуде. Бұл туралы Нұр-Сұлтан қаласының білім саласында сапаны қамтамасыз ету департаментінің басшысы Бағымгүл Көптілеуова мәлім етті, деп тілшісі. «Министрдің тапсырмасына сәйкес, 1 сәуірден бастап департамент өкілдерді ұстаздардан артық есеп-қисап талап ету мәселесіне мониторинг жүргізіп жатыр. Алдымен министрліктің осы №133 бұйрығын орындау мақсатында білім беру ұйымдарының басшылары мен қызметкерлеріне ақпараттық түсіндіру жұмыстары жүргізілді. Сондай-ақ, осы бұйрықты негізге ала отырып, ұстаздардың жұмысы барысында қайталанатын 26 есеп тізімнен алынып тасталды. Мұның өзі ұстаздардың жұмысын жеңілдетуге септігін тигізді», - деді ол. Департамент басшысының сөзіне сенсек, мұғалімдерден артық есеп талап еткені үшін айыппұл қарастырылған. Оның көлемі 20-дан 120 АЕК-ті құрайды. «Осы орайда елордалық ұстаздарға айтатынымыз, өз қызметінен тыс жұмыстарға тарту жағдайы тіркелсе немесе артық есеп талап етілсе, ондай құқықбұзушылық туралы біздің департаментке хабарласуларына болады», - дейді ол.