АСТАНА. 24 Астана қаласында 2012-2013 оқу жылында жалпы білім беретін мектептер саны 70-ке жетті. Бұл туралы Astana.kz сайтына Астана қаласының Білім басқармасынан хабарлады.
Бұл 2010-2011 оқу жылдарымен салыстырғанда 4 мектепке артық. Оның ішінде қазақ тілінде оқытатын мектептер саны - 24, 2010-2011 жылдары 20 болған.
Биылғы оқу жылында Астана қаласында жалпы білім беретін мектептер санына бір мектеп қосылып отыр. Қазақ мектептерінде 2011 жылы - 25 883 оқушы болса, 2012-2013 оқу жылында 29 523 оқушыға жетіп отыр.
Басқарманың мәліметі бойынша, 2012-2013 оқу жылында 24 қазақ мектебі бойынша 2018 мұғалім жұмыс істейді. 1815 мұғалімнің жоғары педагогикалық, 203-інің орта кәсіптік педагогикалық білімі бар. 579 мұғалімнің біліктілік санаты жоғары, 503-і бірінші, 448-і екінші санатқа ие.
Яғни, Астана қаласында 2011-2012 оқу жылында 23 қазақ мектебі болған, ондағы оқушылар саны - 25 883. Бұл көрсеткіш барлық оқушылардың 33,8 % құраса, биылғы оқу жылында мектеп саны біреуге артып, оқушылар саны - 29 523 жеткен, яғни, бұл көрсеткіш барлық оқушылардың 35,3 % құрап отыр.
Бүгінгі таңда, қалаға сырттан келетін тұрғындардың көбеюіне байланысты мектептерде орын тапшылығы сезілуде. Осыған байланысты алдағы уақытта қазақ тілді мектептерді ашу жоспарда бар, - делінген хабарламада.